Lolo tepok sa salpok ng motor

MANILA, Philippines — Binawian ng buhay habang nilalapatan ng lunas sa pagamutan ang isang 76-anyos na lolo matapos salpukin ng isang humagibis na motorsiklo habang tumatawid sa kahabaan ng Maharlika National highway ng Brgy. Anislag sa bayan ng Daraga, Albay kamakalawa ng umaga.

Ang nasawing biktima ay si Elegario Lorica, residente ng Brgy. Maopi, habang dinala sa pagamutan ang sugatan na nakabanggang rider na si Larry Londonio, 55-anyos at angkas na si Glaiza Mandane, 17-anyos, pawang residente rin ng naturang barangay.

Sa ulat, dakong alas-6:00 ng umaga, papatawid ang biktima sa kalsada nang mabangga ng motorsiklo ( E-64434 ) na minamaneho ni Londonio.

Sa lakas nang pagkakabangga ay tumilapon ang biktima ng ilang metro sa kalsada pati na rin ang rider at angkas nito.

Agad namang sinaklolohan ng mga residente at opisyal ng barangay ang mga sugatan at isinugod sa ospital kung saan namatay habang ginagamot ang biktimang matanda.