Duterte planong i-subpoena ang ina ni Trillanes
Sa mga gov’t transactions...
MANILA, Philippines — Planong paimbestigahan ni Pangulong Rodrigo Duterte ang 84-anyos na ina ni Sen. Antonio Trillanes matapos na mapikon ito sa mga banat ng huli sa kanya at kanyang pamilya.
Ayon kay Pangulong Duterte, kaya niyang ipa-subpoena ang ina ni Sen. Trillanes na si Mrs. Estelita Trillanes upang pagpaliwanagin sa mga kwestyonableng transaksyon nito noong naglilingkod pa bilang non-uniform personnel sa Philippine Navy.
Ayon sa Pangulo, napipikon na siya kay Trillanes dahil sa patuloy na pagbanat nito sa kanyang pamilya kaya planong idamay na nito ang 84-anyos na ina nito.
“Sumobra ka.We will initiate an investigation kagaya mo and I will subpoena your mother sa ayaw mo’t sa hindi.Baka sabihin mong walang power, there is. We also have the contempt power but we have to go to court,” wika ni Pangulong Duterte kamakalawa ng gabi sa Manila Hotel.
Nauna nang inihayag noon ni Trillanes na huwag idamay ang kanyang 84-anyos na ina na may sakit pa.
“Just do ito”, naman ang sagot ni Trillanes sa balak ni Pangulong Duterte na ipa-subpoena ang kanyang ina dahil sa mga diumano’y kuwestyunableng transaksiyon sa Philippine Navy.
Sinabi ni Trillanes, simula noong Setyembre 2018, palaging sinasabi ni Duterte na aatasan niya ang iba’t ibang ahensiya ng gobyerno na imbestigahan ang mga transaksiyon ng kanyang 84-taong gulang na ina na mayroon na ngayong Alzheimer’s na hanggang ngayon ay wala namang naipapakitang ebidensiya sa kanyang mga walang basehang akusasyon.
- Latest