PWD pinatay ng pinsan na baliw
MANILA, Philippines — Hindi na umabot ng buhay sa ospital ang biktimang si Danilo Balmeo, 57, na may kapansanan sa paglalakad matapos na pagtatagain ng kanyang pinsan na baliw na si Fidel Balmeo, 52, kamakalawa ng hapon sa Valenzuela City.
Sa ulat, dakong alas-4:00 ng hapon nang makita ng saksing si Edwin Rustia ang biktima na duguang nakahandusay sa kalsada na tapat ng kanilang bahay.
Ilang sandali ay nakita niya ang suspek na lumabas ng bahay sa tapat ng biktima na walang damit pang-itaas at duguan ang mga kamay.
Agad na humingi ng saklolo si Rustia sa mga barangay tanod sa lugar at tauhan ng Police Community Precinct 4 na agad na rumesponde at nagresulta sa pagkakadakip sa suspek.
Narekober ng mga pulis ang nasa 12 pulgadang patalim na hinihinalang ginamit ng suspek sa pamamaslang.
Nabatid na may problema umano sa pag-iisip ang suspek na sumailalim na sa mental medication noong nakaraang taon.
Habang nasa loob ng presinto ay wala ring makuhang maayos na sagot ang mga imbestigador sa suspek kung bakit niya nagawa ang krimen.
- Latest