Aktres, 3 pa huli sa P3-M marijuana
MANILA, Philippines — Inaresto ng pinagsanib na puwersa ng Philippine Drug Enforment Agency (PDEA) at pulisya ang isang aktres at tatlo niyang kasamahan matapos na mahulihan sa umano’y pagdadala ng marijuana sa Brgy.Urbiztondo, San Juan, La Union noong Martes.
Kinilala ni Senior Superintendent Ricardo Layug Jr., La Union police director ang aktres na si Roence Santos, 42, residente ng Los Baños, Laguna; Marty Razon, 32; Gary Herela, 32 at Mark Norega, pawang mga taga-Dasmariñas City, Cavite.
Nasamsam sa mga suspek ang 9 brick ng marijuana na tumitimbang ng 25 kilos na nagkakahalaga ng P3 milyon, Toyota Fortuner (ASA-2328) at drug paraphernalias.
Ayon naman kay PDEA La Union Provincial Officer Darnel Bacate, sinabi nito na kasama ang pulisya ay kanilang na-intercept ang sports utility vehicle na sinakyan ng mga suspek dahil sa impormasyon na may dala umanong droga ang mga ito.
Galing umano ang mga suspek sa Cavite at tinangka umano nilang dalhin ang marijuana bricks sa bayan ng San Juan o sa bahagi ng San Gabriel, La Union.
Si Santos ay lumalabas sa ilang mga serye sa telebisyon tulad ng “Daig kayo ng lola ko”, “Kambal Karibal” at iba pa.
- Latest