2 holdaper dedo sa Quezon City shootout
MANILA, Philippines — Dalawang holdaper ang nasawi nang makipagbarilan sa mga pulis na humahabol sa kanila matapos na holdapin ang isang babae na call center agent kahapon ng madaling araw sa Payatas Road, Quezon City.
Inaalam pa ang pagkakakilanlan ng dalawang suspek na nakuhaan ng dalawang kalibre 38 baril, isang motorsiklo,14 sachet ng umano’y shabu at isang nakaw na bag na pag-aari ng kanilang hinoldap na babae na kinilalang si Maribel Fernandez, isang call center agent.
Sa ulat ng pulisya, dakong alas-2:15 ng madaling araw ay nakapuwesto ang mga pulis sa Molave Street para sa checkpoint kaugnay ng election period nang mapadaan ang isang motorsiklo lulan ang dalawang suspek.
Hindi huminto ang mga ito at pinaharurot ang kanilang motorsiklo kaya’t hinabol sila ng mga pulis hanggang sa nakorner sa Lupang Pangako sa Payatas .
Subalit, sa halip na sumuko ay nakipagbarilan umano ang mga ito na nagresulta ng kanilang kamatayan.
Kinilala ni Fernandez na ang dalawang napatay ay siyang nag-agaw sa kanyang bag.
- Latest
