DepEd: Posible ang ‘expulsion’ sa bully student
MANILA, Philippines — Kung sakali umanong hindi nasiyahan ang pamilya ng biktima sa parusang ‘dismissal’ ng Ateneo de Manila University sa bullying student na isang Junior High School ay posibleng mauwi ito sa parusang “expulsion”.
Ito ang inihayag ni Department of Education (DepEd) Secretary Leonor Briones na maaaring rebyuhin ng DepEd ang desisyon ng AdMU.
“Kung mangyare man na i-akyat sa Department of Education, ire-review ‘yan kasi ang pinag-uusapan dito ay kung expulsion ba o dismissal,” ani Briones
Una nang sinabi ng pamunuan ng AdMU na matapos ang masusing pag-iimbestiga sa kaso ay nagdesisyon silang patawan ng dismissal sa kanilang unibersidad ang naturang ‘bully student’, na nangangahulugang hindi na ito maaaring makabalik pa sa AdMU.
Ipinaliwanag naman ni Briones na iba ang dismissal sa expulsion, dahil alinsunod aniya sa DepEd Manual, ang expulsion ay nangangahulugang hindi na papayagan pa ang nagkasalang estudyante na matanggap sa alinmang public o private school sa Pilipinas, habang ang dismissal naman ay nangangahulugang hindi lamang siya maaaring mag-enroll sa pinanggalingan niyang paaralan.
Aminado naman si Briones na karamihan sa mga bullying incident ay naaayos na sa pamamagitan ng isang dayalogo sa pagitan ng mga magulang ng mga batang sangkot at ng pamunuan ng unibersidad.
- Latest
