Agawan sa bahay... mag-utol na ‘senior’ binaril, Sinunog ni kuya

MANILA, Philippines — Dahil lamang sa agawan sa bahay, karumal-dumal na kamatayan ang sinapit ng dalawang nakababatang magkapatid sa kamay mismo ng kanilang 77-anyos na kuya nang matapos pagbabarilin hanggang sa mapatay ay saka sinunog pa ang mga ito naganap sa Brgy. Concepcion Uno, Marikina City kamakalawa ng gabi.

Kinilala ang mga nasawing sina Felicito Soriano, 72, isang negos­yante, at Enrico Soriano, 60, isa namang abogado.

Nasa kustodiya naman ng pulisya ang suspek na si Nilo Soriano, 77, isang retiradong maintenance engineer.

Sa ulat ng Marikina City PNP, dakong alas-10:35 ng gabi nang maganap ang krimen sa loob ng bahay ng magkakapatid na Soriano na nasa Peru St., Greenheights Subdivision, sa nasabing barangay.

Bago ito, sa salaysay ng kasambahay na si Wilfreda Regonas, 47 ay nag-away-away ang magkakapatid hinggil sa pagmamay-ari ng kanilang bahay, habang nag-aalmusal dakong alas-8:35 ng umaga, na nauwi sa pagbabanta ng suspek na papatayin ang mga biktima.

Hindi naman umano naayos ang sigalot sa pagitan ng tatlo, kaya’t pagsapit ng gabi ay kumuha ng baril ang suspek at pinagbabaril sina Felicito at Enrico at saka binuhusan ng gasolina bago sinilaban.

Agad naman nai-report ni Regonas ang pangyayari sa pulisya na agad namang nirespodehan kasama ang mga bumbero para apulain ang sunog, na naideklarang fireout dakong alas-11:05 ng gabi.

Isinugod din naman ng mga pulis sa pagamutan ang suspek upang malunasan dahil sa tinamong 3rd degree burns sa kanyang katawan, matapos na hindi kaagad makalabas ng nasusunog na tahanan.

Nakuhanan ng mga otoridad ng isang compact handgun na may magazine na walang bala ang suspek.