Rider utas, angkas kritikal sa bus

MANILA, Philippines — Isang 35-anyos na rider ang nasawi habang kritikal ang lagay ng angkas matapos na banggain sila ng kasalubong na bus kamakalawa ng gabi sa kahabaan ng Maharlika National Highway sa Brgy.Mabolo sa Naga City, Camarines Sur.

Idineklarang dead on arrival sa Bicol Medical Center ang rider na si Anthony Bien, residente ng Tapaz Compound, Brgy.Balatas habang ang angkas nitong si Angeliza Morfe, 35 ay patuloy na inoobserbahan sa nasabing ospital.

Batay sa ulat, bago nangyari ang aksidente dakong alas-11:00 ng gabi ay binabagtas ng mga biktima ang nasabing highway nang mago-overtake umano ang DLTB Bus (UYA-469) na minamaneho ni Ricky Cena, 49, residente ng Brgy. Bagong Bayan, Mauban, Quezon at hindi nito nakita ang kasalubong na motorsiklo ng mga biktima kaya’t ito ay nabangga.

Sa lakas nang pagkakabangga ay tumilapon  nang ilang metro sa kalsada ang mga biktima na sinaklolohan ng mga residente at isinugod sa ospital pero nasawi habang ginagamot si Bien.

Nakatakdang sampahan ng kasong reckless imprudence resulting in homicide and physical injuries ang driver ng bus.