Karambola sa Laguna: 6 patay, 14 sugatan
Trak inararo ang 19 sasakyan at bakery...
MANILA, Philippines — Anim katao ang nasawi kabilang ang dalawang paslit habang 14 ang nasugatan matapos na banggain ang 15 sasakyan, 2 tricycle at 2 motorsiklo bago sumalpok sa bakery na nasa highway naganap kamakalawa ng gabi sa Sta. Rosa City, Laguna.
Sa ulat ni Laguna police director Sr. Supt. Eleazar Mata, kinilala ang mga nasawi na sina Lorelyn Rosel Sumadsad, mag kapatid na sina Jerome 27 at Jayson Baluya 25, Quelah Ayesha Velasco, 1-anyos; Juvelyn Floresco Delizo 21 at anak na si Ariane Kaye Yllera, 2.
Habang nasugatan ang 14 na iba pa at dinala at ginagamot sa mga ospital.
Sa imbestigasyon ni PO3 Daniel Bahiwag, bago nangyari ang aksidente dakong alas-11:30 ng gabi sa kahabaan ng Sta. Rosa-Tagaytay Road, Barangay Sto. Domingo ay nawalan ng preno ang isang 14-wheeler truck na minamaneho ni Anthony Bernardo, ng Dasmariñas, Cavite at may kargang mga bakal at dahil sa pababa ang kalsada ay nasapol ang mga sasakyan.
“Napakabilis ng truck at nagkataon na mabagal ang daloy ng trapiko dahil naglalabasan ang mga tao mula sa Nuvali”, wika ni Bahiwag. Nang mabangga ang 19 sasakyan ay nasalpok naman nito ang bakery na nasa tabi ng highway at iba pang establisyimento.
Ayon sa pulisya na ang mga nasawi ay natutulog sa bakery at mga naglalakad sa kalsada.
Tumakas naman ang driver ng truck matapos ang insidente. Umabot ng mahigit anim na oras bago naalis ang mga nasalpok na sasakyan at ang trak. - Cristina Timbang
- Latest