2 ‘pusher’ tiklo sa P3 milyon shabu

MANILA, Philippines — Swak sa kulungan ang dalawang sinasabing kilabot na ‘tulak’ ng shabu habang nasa higit P3-milyong halaga ng droga ang nakumpiska mula sa mga ito sa isinagawang drug operation ng mga otoridad sa Taguig City, Biyernes ng gabi.

Himas-rehas na ngayon ang mga suspek na sina Jayson Esguerra at Rodolfo Dejos, kapwa nasa hustong gulang at pawang taga-Brgy. Manuel ng naturang lungsod.

Ayon sa tanggapan ni NCRPO Director Guillermo Eleazar, Biyernes ng gabi nang magkasa ng buy-bust operation ang kanyang mga tauhan kontra sa mga suspek sa nabanggit na barangay.

Isang pulis ang tumayong buyer at nang magpositibo ay dito na agad inaresto ang mga suspek.

Nakumpiska mula kina Dejos at Esguerra ang mahigit sa kalahating kilong shabu na nagkakahalaga ng mahigit sa P3-milyon na nakalagay sa anim na plastic bag, 150 pirasong anti-depressed drugs, marked money na halagang P1,000.00 at boodle money.