Pasahe sa jeep balik P9
MANILA, Philippines — Balik sa P9 ang minimum na pasahe sa pampasaherong jeep matapos na atasan kahapon ng pamunuan ng Department of Transportation (DOTr) Sec. Arthur Tugade si Land Transportation Franchising and Regulatory Board (LTFRB) Martin Delgra.
Alinsunod sa Board Resolution No. 091, Series of 2018 na pinirmahan kahapon ng hapon ni LTFRB chairman Delgra, at board members Engr. Ronaldo Corpus at Atty. Aileen Lourdes Lizada ay ibinabalik sa P9 ang minimum fare sa passenger jeepneys sa Regions 3, 4 at National Capital Region (NCR) para sa unang apat na kilometro ng biyahe.
Ayon pa sa resolusyon, magiging epektibo ang naturang rollback sa pasahe sa lalong madaling panahon matapos na mailathala ang kautusan sa mga pahayagan.
Ilalathala naman umano kaagad ito sa mga pahayagang may general o local circulation ng LTFRB ngayong araw.
Ang pagrolbak sa pasahe ay bunsod nang sunod-sunod na pagbaba ng presyo ng produktong Petrolyo.
- Latest
