Navy officer, nilikida

MANILA, Philippines — Nasawi noon din ang isang opisyal ng Philippine Navy matapos pagbabarilin ng isang sinasabing hitman ng mga rebeldeng New People’s Army habang pauwi ng kanyang tahanan sa Pio Duran, Albay, nitong Biyernes ng hapon.

Sa report ni Police Regional Office (PRO) V Director P/Chief Supt. Arnel Escobal, kinilala ang nasawing biktima na si Senior Chief Petty Officer Jesus Zaavedra, 55 taong gulang, at nakatalaga sa naval base sa lungsod ng Legaspi.

Sa ulat, dakong alas-4:10 ng hapon habang pauwi na ang biktima sa kanilang tahanan nang sunud-sunod na pagbabarilin ng suspek hanggang sa mapaslang sa isang lugar sa Brgy. Binodegahan sa bayang ito.

Nabatid naman kay Ensign Estela Jane Sasil, Spokesperson ng Naval Forces Southern Luzon, ang biktima ay nakatakda na sanang magretiro sa serbisyo sa susunod na taon.

Nabatid na bago ang insidente ay nakatanggap ng death threat ang biktima mula sa grupo ng NPA rebels.