Trillanes ‘di dapat magbunyi!
MANILA, Philippines — Hindi umano dapat munang magbunyi si Sen. Antonio Trillanes IV sa ipinalabas na desisyon ng Makati Regional Trial Court na hindi magpalabas ng arrest warrant at hold departure order na hiniling ng Department of Justice (DOJ).
Ito ang sinabi ni Presidential Spokesman Salvador Panelo dahil ang ibinasura lang naman ay iyong pag-isyu ng warrant. Pero iyong mas mahalagang legal issue na iyon bang grant of amnesty valid o hindi ay binigyan ng diin ng hukuman na hindi valid na ibig sabihin ay void.
“Hindi ba mula’t sapul iyon ang pinag-uusapan, sinasabi nila na nag-file siya ng amnesty at binigyan sila ng amnesty. Ang sabi ng korte, tama iyong proklamasyon na pinapawalang-bisa at dinideklarang nullity iyong grant of amnesty.Kaya hindi siya nag-isyu ng warrant of arrest, sang-ayon sa kaniya, kasi applicably daw iyong tinatawag na inevitability ng isang judgment, ano ba ang ibig sabihin noon, ibig sabihin eh final na iyon. Kaya hindi na maaring pumasok ang isang hukuman sapagkat wala siyang jurisdiction. O, ito ang tanong ko naman, kung walang jurisdiction ang hukuman na ito, eh bakit mo dininig ang kaso, bakit iyong dalawang partido hinayaan mong magprisenta ng mga ebidensiya, eh di ibig sabihin may jurisdiction,” giit pa ni Panelo.
Kaya naniniwala si Panelo na hindi dapat magbunyi ang kampo ni Trillanes dahil sa naging desisyong ito ng korte dahil kinatigan din ng hukuman na legal ang ginawang Proclamation 572 ni Pangulong Duterte na nagdedeklarang void ang amnesty na ibinigay kay Trillanes mula sa simula.
Siniguro rin ng Malacañang na iaakyat sa Court of Appeals ang naging desisyon ng Makati RTC na nagbasura sa mosyon ng DOJ para sa arrest warrant at HDO.
Nakausap na ni Panelo si Solicitor-General Jose Calida at siniguro sa kanyang aapela sila sa CA sa halip na magharap ng motion for reconsideration sa sala ni Judge Andres Soriano ng Makati-RTC branch 148.
Pero nilinaw din kahapon ni Justice Sec. Menardo Guevarra, ang DOJ ang magdedesisyon kung ano ang gagawin nilang susunod na legal na hakbang.
- Latest
