Makati RTC hindi pa rin naglabas ng warrant at HDO vs Trillanes
MANILA, Philippines — Matapos ang 10 araw para magkomento sa motion na inihain ng Deparment of Justice ay hindi pa rin naglabas kahapon ng warrant of arrest at hold departure order (HDO) si Makati City Regional Trial Court (RTC) Judge Andres Bartolome Soriano ng Branch 148 laban kay Senador Antonio Trillanes IV.
Alas-9:00 kahapon ng umaga nang isagawa ang pagdinig sa sala ni Judge Soriano at dumalo ang abogado ni Trillanes na si Atty. Reynaldo Robles habang tatlo sa DOJ prosecution panel na sina Prosecutors Richard Anthony D. Fadullon; Juan Pedro C Navera at May Jane W. Sytat.
Hiniling ni Atty. Robles, na bigyan sila ng sapat na panahon para makapagsumite ng rejoinder at dagdag na komento sa motion na inihain ng DOJ laban sa senador.
Pinagbigyan naman ng korte ang hiling ng kampo ni Trillanes na bigyan ng 10 araw para magsumite ng rejoinder at supplemental comments para sa naunang komento ng DOJ hinggil sa resolusyon ng Korte Suprema.
Habang binigyan naman ng korte ng limang araw ang DOJ para tumugon sa ihahaing supplemental comments ni Trillanes.
Magugunita na naghain ang DOJ ng motion para labasan ng warrant of arrest at HDO si Trillanes sa Makati City RTC matapos bawiin ni Pangulong Rodrigo Duterte ang amnestiyang ibinigay sa senador ng nakaraang administrasyon dahil sa kasong kudeta at rebellion noong 2003 at Manila Peninsula Seige noong 2007.
Ngayong umaga ay didinggin naman ang kasong rebelyon sa sala ni Makati City RTC Judge Elmo Alameda, ng Branch 150.
- Latest