20 pa sugatan, konduktor ng bus putol ang paa sa aksidente sa Quezon City
MANILA, Philippines — Kamalasan ang inabot ng isang 29-anyos na kunduktor ng bus makaraang maputulan ng paa habang 20 katao pa ang nasugatan nang sumalpok sa isang poste ang sinasakyan nilang bus sa lungsod ng Quezon, kamakalawa ng gabi.
Patuloy na ginagamot sa East Avenue Medical Center ang kunduktor ng bus na si Jeffrey Millena Simbulan, binata na nakatira sa Blk. 55 Lot Area C Purok Sapang Palay.
Ang 20 pang nasugatan ay una rin isinugod sa nasabing pagamutan matapos magtamo ng sugat, galos at bukol sa iba’t-ibang bahagi ng kanilang mga katawan.
Sa imbestigasyon ni PO3 Leonardo Policarpio ng Quezon City Traffic Sector, dakong alas-10:55 ng gabi nang mangyari ang aksidente sa Commonweath Ave., Northbound lane corner Magsaysay St., Brgy. San Vicente, Quezon City.
Ayon sa driver ng bus ng Precious Grace Transport na may biyaheng Grotto-NAIA na si Joel Castillon, hindi umano kumagat ang preno ng bus kaya ibinangga na lamang niya sa isang poste sa Commonwealth Ave. malapit sa U.P TechnoHub upang maiwasan ang mas malagim na aksidente.
Tiniyak naman ng may-ari ng bus na sasagutin nila ang lahat ng gastos sa pagpapa-ospital sa mga nasugatang pasahero. Gayunman ay kakasuhan pa rin ng reckless driving, resulting to mulitple physical injuries ang driver ng bus.
- Latest