Lalaki inutas sa masamang tingin
MANILA, Philippines — Ang umano’y pagtingin nang masama ng isang 35-anyos na lalaki habang umiinom sa loob ng isang videoke bar sa apat na kalalakihan ang naging dahilan ng kamatayan nito matapos na siya ay pagtulungang gulpihin at saksakin kahapon ng madaling araw sa Malabon City.
Ang biktima na idineklarang dead-on-arrival sa Tondo Medical Center ay kinilalang si Francis Bonador, binata, at naninirahan sa No. 215 Sitio 6 Brgy. Catmon.
Sa apat na salarin, tanging ang 17-anyos na itinago sa alyas na “Masoy” ang nadakip ng mga pulis at nasa kustodiya na ng City Social Welfare and Development Office.Habang pinaghahanap ang mga kasamahan niyang sina Yong Jaramilla, Noriel Loyogoy, at Richard Tuling, pawang mga tindero at nakatira sa Sito 6 Dumpsite, ng naturang barangay.
Sa ulat ng pulisya, bago nangyari ang krimen dakong ala-1:30 ng madaling araw ay nag-iinuman ang grupo ng mga suspek at ang biktima sa magkahiwalay na mesa sa loob ng Bingbok Eatery and KTV sa may No. 199 Gov. Pascual, Brgy. Tugatog.
Nilapitan ng suspek na si Loyogoy ang biktima sa kanyang mesa at tinanong kung bakit masama makatingin na hindi nagustuhan ng huli ang tanong kaya’t pumalag ito na nauwi sa suntukan.
Sinaklolohan si Loyogoy ng mga kasama at sinaksak ni Jaramilla ang biktima sa kanang kili-kili habang habang pinalo naman siya sa ulo ng bote ng beer ng binatilyong si Masoy.
Naawat naman ng mga tauhan ng bar at tanod ang mga suspek na nagsitakas ngunit nadakip ng mga tanod si Masoy. Ang mga suspek ay kinasuhan ng murder sa Malabon City Prosecutor’s Office.
- Latest
