DOT employees bawal nang maglabas ng produkto mula Duty Free

MANILA, Philippines — Pinagbabawalan nang maglabas ng mga produkto ang mga opisyal ng Department of Tourism (DOT) mula sa Duty Free Philippines.

Ito ang iniutos ni Tou­rism Secretary Bernadette Romulo-Puyat matapos umano niyang ipatanggal ang prebilihiyo ng mga opisyal ng ahensya.

Nakakalungkot anyang isipin na nasasamantala umano ang VIP treatment ng mga empleyado ng DOT.

Hindi porke’t ang Duty Free ay ahensya na nasa ilalim ng pangangasiwa ng DOT ay dapat nang ikatuwa ng mga nanunungkulan ang pagkakaroon ng VIP treatment dito.

Nabatid na 50% ng taunang kita ng Duty Free ay otomatikong napupunta sa Office of the Secretary kung saan maaaring magamit para pondohan ang mga tourism programs at projects.

Kung matatandaan ay inihayag ng Commission on Audit (COA) ang pagkuha umano ng P2.52 milyon halaga ng produkto mula sa Duty Free stores sa ilalim ng pamumuno ni dating Tourism Secretary Wanda Tulfo-Teo.