HVT tiklo sa P6.5-M shabu
MANILA, Philippines — Isang High Value Target (HVT) ng pulisya ang nasakote sa isang drug buy bust operation at nasamsam dito ang nasa P 6.5 milyon halaga ng shabu kahapon ng umaga sa Upper Kawayan, Brgy. Sambag 2, Cebu City.
Ang nasakote ay kinilalang si Rainhard Barring Moreno, 29, nakatala bilang HVT sa drug list ng Cebu City Police.
Batay sa ulat, nasakote ang suspek dakong alas-6:35 ng umaga sa operasyon ng anti-drug operatives ng Cebu City Police sa nasabing lugar.
Nabatid na una nang nasakote ang suspek noong 2016 sa pag-iingat ng nabulphine, isang uri ng droga at nasakote rin nitong nakalipas na taon ng drug paraphernalias.
Hindi umano tumigil ang suspek sa pagbebenta ng nasabing itinuturok na uri ng droga na ang epekto ay nagdidiliryo ang gagamit nito at mawawala sa katinuan bukod pa sa iba pang uri ng pinsala sa kalusugan,
Kaya’t sinalakay ng mga operatiba ang drug den ni Moreno at mismong mga otoridad ay nasorpresa nang tumambad sa kanila ang bulto ng shabu na nasa pag-iingat nito na aabot sa P6.5 milyon ang halaga.
- Latest
