Utak sa Mayor Bote murder, kinilala
MANILA, Philippines — Kilala at pinangalanan na ng Philippine National Police (PNP) ang utak sa pagpatay kay General Tinio, Nueva Ecija Mayor Fernando Bote na isang public contractor at mahigpit na karibal sa negosyo ng alkalde.
Kinilala ang utak sa pagpatay na si Christian Saquilabon, may-ari ng Forthright Construction, isang kontraktor ng mga proyekto ng gobyerno na tinukoy ng unang nasakoteng suspek na sina Florencio Suarez at Robert Gumatay na binayaran ng una para patayin si Mayor Bote.
Magugunita na sina Suarez at Gumatay ay nasakote sa checkpoint sa Andaya Highway sa Brgy. Cabasag, del Gallego, Camarines Sur noong Hulyo 11 habang si Arnold Gambola, isang arkitekto ay sumuko naman sa mga otoridad.
Ang mastermind na si Saquilabon, Junjun Fajardo, isang spotter at dalawa pang John Does ay patuloy na pinaghahanap ng mga otoridad.
Lumilitaw naman sa imbestigasyon na binayaran ni Saquibon ng P 25,000 ang mga salarin upang paslangin si Mayor Bote na karibal nito sa construction business ng Department of Public Works and Highways (DPWH) at National Irrigation Administration (NIA) sa Nueva Ecija.
Ang pinakahuli sa proyekto ni Saquilabon ay ang pagpapaunlad sa Minalunga Tourism Conservation Park sa General Tinio na nagkakahalaga ng P69-M na bagaman napagwagian ng una ay hinaharang umano ito ni Mayor Bote dahilan sa nasasakupan ito ng kaniyang bayan.
Una nang sinampahan ng kaso sina Suarez at Gumatay ng paglabag sa Republic Act (RA) 10591 o ang Anti Firearms and Ammunition Act matapos na makumpiskahan ng mga eksplosibo, baril at mga bala.
Habang ang hindi pa naaarestong mga suspek ay kinasuhan ng murder.
- Latest