PTV 4 magpapalabas ng Chinese at Asians movie

MANILA, Philippines — Hindi lamang teleserye at pelikula ng China kundi maging ibang bansa sa Asya ang bibida rin sa bagong bihis na PTV 4.

Ito ang paglilinaw ni Presidential Communications and Operations Office (PCOO) Secretary Martin sa isinagawang PTV 4 Trade Launch sa Marquis Event Place sa Taguig City.

Binigyang-diin ni Andanar na walang dapat ikabahala ang publiko partikular ang Senate Minority bloc dahil hindi lamang China ang kanilang prayo­ridad sa pakikipagpalitan ng mga pelikula at TV series.

“Ang mahalaga po dito ay meron tayong iba’t ibang memorandum of understanding kung titingnan nyo po ang memorandum of understanding o coo­peration, meron po tayo sa Russia, meron po tayo sa China, Japan, South Korea, Cambodia. Meron po bago sa Thailand, meron bagong ire-renew sa Myanmar.We work with the entire ASEAN, we also work with other countries,” saad ni Andanar.

Layunin ng programa ay ang malayang promosyon ng kultura ng iba’t ibang bansa sa Pilipinas habang libre rin ang Pilipinas na makakapag-promote ng sariling mga palabas sa nasabing mga bansa.

“Ang mahalaga po rito yung mga programa na ibibigay sa atin ay libre. Wala po tayong gastos dun and of course, yung programa na meron tayong matutunan pagdating sa kanilang kultura or maybe just a glimpse of their technology and also the way that they produce shows,” dagdag ng kalihim.

Tiniyak ni Andanar na matututo rin ang bansa bukod sa kultura ay ang iba’t ibang teknolohiya o larangan na ginagamit ng ibang bansa sa kanilang mga produksyon.