4 papuntang lamay patay sa bangga
MANILA, Philippines — Apat katao kabilang ang 5-buwang sanggol na lalaki na sakay ng isang multicab na papunta sanang lamay ang nasawi matapos na masalpok ng isang trak kamakalawa ng alas-4:00 ng madaling araw sa Brgy. Maluko, Manolo Fortich, Bukidnon.
Ang mga nasawi ay kinilalang sina Otelo Sadicon; Narcisa Balong; at Sandra Abecia; at anak nitong si Sadecon, 5 buwang gulang.
Batay sa ulat, sakay ang apat na nasawi ng multicab na galing sa Maramag, Bukidnon at papunta sana sa Balingoan, Misamis Oriental para dumalo umano sa isang lamayan.
Nabatid na mabilis ang takbo ng multicab at umano ay nag-overtake at nasalpok nang paparating na forward truck na minamaneho ng hindi pa pinangalanang driver.
Sa lakas nang pagkakabangga ay tumilapon ang mga nasawi maliban pa sa 11 ang nasugatan na dinala sa Bukidnon Provincial Hospital.
Ang driver ng trak ay kinasuhan ng reckless imprudence resulting in multiple homicide, multiple serious physical injuries and damage to properties.
- Latest
