Mayor inambush: 4 todas
MANILA, Philippines — Nasawi ang apat na katao kabilang ang isang barangay chairman at isang pulis habang masuwerte namang nakaligtas si Municipal Pantao Ragat Mayor Lacson Lantod matapos ratratin ng mga armadong kalalakihan ang sinasakyan nilang pick-up, kahapon ng umaga sa Lanao del Norte.
Dead-on-the-spot ang mga biktimang kinilalang sina Barangay Captain Kalic Disamburun at isang alyas “Tarapas” habang hindi na umabot pa nang buhay sa pagamutan dalawa pang biktima na sina P01 Macalaba at Casanuding Hasim.
Ginagamot naman sa Minadanao Sanitarium Hospital sa Iligan City ang tatlo pang kasama sa sasakayan na nasugatan sa ambush na sina P01 Mangonte, Brgy Capt. Parmon Macarimbang at SB Acmad Magumnang
Mapalad namang nakaligtas at hindi man lang nagalusan o nasugatan si Mayor Lantod.
Lumalabas sa inisyal na imbestigasyon ni PNP -Provincial Regional Office 10, na dakong alas-8:00 ng umaga kahapon nang maganap ang insidente.
Sakay umano ang mga biktima at ang alkalde ng isang Toyota pick-up hi-lux nang tambangan sila at pagbabarilin ng mga armadong lalaki sa Brgy Cabasagan Pantao Ragat, Lanao del Norte.
Patuloy namang nagsasagawa ng follow-up operation ang mga otoridad laban sa mga suspek na mabilis na tumakas matapos ang pananambang.
- Latest
