Dalawang nagwaging tserman inaresto sa droga at pagpatay
MANILA, Philippines — Isang nanalong barangay chairman na kinilalang si Melvin Fortaja ang inaresto ng mga otoridad nang masamsam sa bahay nito ang limang sachet ng shabu at baril sa isinagawang raid kahapon ng madaling araw sa Brgy. Malasila, Makilala, North Cotabato.
Bagama’t wala sa lista ng PDEA sa kanilang listahan ay sinubaybayan at minonitor ito dahil sa nakukuha nilang mga impormasyon na sangkot ito sa drug trade.
Ikinasa kahapon ng PDEA ang search warrant sa bahay ng pamilya at sa paghahalughog ay nasamsam ang nasabing mga droga at kalibre 45 baril.
Hinala naman ng pamilya ng suspek na may bahid pulitika ang pagkakaaresto matapos na manalo noong Lunes sa election. Ang suspek ay sasampahan ng kasong paglabag ng RA 9165 o Comprehensive Dangerous Drugs Act.
Isa pang nanalong barangay chairman na si Jolly Ladiero ang inaresto at sinampahan ng kasong murder matapos na ituro ito na siyang pumatay sa nakalabang incumbent barangay chairman na si Bartolome Mackay noong Mayo 9 sa Brgy. Trinidad, Mallig, Isabela.
Ayon kay Isabela Police Director Sr. Supt Mariano Rodriguez na may mga saksing nagturo kay Ladiero na noon ay no.1 Kagawad bilang isa sa mga nagtumba kay Mackay na noon ay nag-eehersisyo sa bukirin.
Lumakas ang ebidensiya laban kay Ladiero nang magpositibo ito sa paraffin test na isinagawa ng police crime laboratory.
Tinalo ni Ladiero ang biyuda ni Mackay na tumayong substitute candidate noong May 14 elections.
- Latest