5,000 ‘undocumented Filipinos’ nasa Kuwait
MANILA, Philippines — Tinatayang nasa 5,000 pang mga Filipino ang nasa Kuwait upang patuloy na makipagsapalaran sa naturang bansa sa kabila ng pagtatapos ng ibinigay na amnestiya,
Sinabi ni Philippine Ambassador to Kuwait Renato Pedro Villa na marami sa naturang mga Filipino ay mga tumakas sa kanilang mga amo at tumatanggap ng mga ‘part time’ na trabaho para mabuhay.
Sa kabila ng pagtatapos ng amnestiya ng Kuwait nitong Abril 22 para makauwi sa Pilipinas ang mga Pinoy na walang ‘working documents’ sa bansa ay nagbabakasakali pa rin umano ang mga Pinoy na makakuha ng magandang trabaho kahit na mag-uumpisa na ang malawakang ‘crackdown’ ng pamahalaan ng Kuwait sa mga dayuhang walang dokumento.
Nasa 4,494 OFWs na ang naipabalik sa Pilipinas ng Department of Foreign Affairs sa ipinatupad na amnestiya.
Sinabi ni Foreign Affairs Undersecretary for Migrant Workers Affairs Sarah Lou Arriola, gumastos ang pamahalaan ng P66.1 milyon para sa biyahe ng mga OFWs at P22.5 milyon para sa financial assistance sa kanila.
- Latest
