2 bomber tiklo, 16 sugatan sa 2 pagsabog
MANILA, Philippines - Nasugatan ang 16 katao sa dalawang magkahiwalay na pagsabog na kung saan ay naaresto ang dalawang bomb expert na miyembro ng Moro Islamic Liberation Front (MILF) kamakalawa ng gabi sa Tacurong City, Sultan Kudarat.
Ang mga nasugatan ay kinilalang sina Staff Sgt. Logen Presaldo, SSgt. Ramel Garde at Cpl. Alvin Jimenez, pawang miyembro ng bomb disposal team; SPO2 Jasper Garcia, PO2 Gerard Martin San Pedro; PO1 Eleazar Sustiguer; Roger Bamo; Danica Ella Ballaran; Reymart Del Rosario; Saulsalito Manoy; Joseph Liba; Leo Cueva; Michael Pon; Ryan Omar Ali; Richard Pineda; at Ivy Eunice Tobias na isinugod sa iba’t ibang pagamutan sa lungsod.
Ang dalawang suspek na naaresto sa isang follow-up operations ay kinilalang sina Johari Gani, nakumpiskahan ng Mk2 fragmentation grenade at Warren Gani, nakunan naman ng M67 fragmentation grenade kapwa residente ng Maguindanao.
Si Warren ay nakatalaga sa MILF Task Force Gani habang si Johari naman ay kasapi ng 106th Base Command ng MILF.
Sa ulat, dakong alas-6:40 ng gabi nang mangyari ang unang pagsabog sa bubungan ng rest room ng Dragon Gasoline Station sa national highway sa Brgy. Isabela ng lungsod na ito.
Nagresponde ang pinagsanib na elemento ng Explosive and Ordnance Division (EOD) team ng pulisya at militar na kasalukuyang nagsasagawa ng post blast investigation nang sumabog ang ikalawang bomba na nakatanim sa compound ng nasabing gasoline station.
Bago ang pagpapasabog ay kumalat sa text messages sa Central Mindanao ang umano’y ilulunsad na pagpapasabog ng BIFF sa mga lungsod ng Tacurong, Koronadal, Kidapawan, Davao at Cotabato bilang resbak umano sa pagkamatay ng Sub-leader ng Abu Sayyaf na si Muammar Askali alyas Commander Abu Rahmi sa bakbakan sa Inabanga, Bohol noong Abril 11 ng taong kasalukuyan.
- Latest