5-10 dayuhang terorista nasa bansa
MANILA, Philippines - Ibinulgar kahapon ni Philippine National Police (PNP) Chief P/Director General Ronald Dela Rosa na nasa 5-10 ang dayuhang terorista ang kanilang minomonitor na umano ay nagsasanay o ginagawang ‘training ground’ sa terorismo ang Pilipinas.
Ang mga suspek ay hinihinalang may ugnayan sa Islamic State of Iraq and Syria (ISIS) at maliban sa nasabing bilang na international terrorists ay maaring may mga kasamahan pa ang mga ito na nasa Mindanao Region.
Una nang isiniwalat ng Central Mindanao Police na ang dayuhang napatay sa engkuwentro sa Maasim, Sarangani noong Linggo ay sangkot sa recruitment ng lokal na teroristang Ansar Al Khilafah Philippines.
“ Parang Sudanese national ito na bumiyahe dito sa Pilipinas na pangalan ay si Abu Naila kasama yung kanyang asawa nakuha natin
kahapon”, ayon pa sa PNP Chief.
Sa naunang intelligence report ay lumabas na Pakistani umano ang nasawing dayuhan pero may nagsasabi ring isa itong Syrian.
Patuloy ang pagtugis ng mga otoridad laban sa mga dayuhang terorista at mga lokal na grupong banta sa seguridad na kaalyado ng mga ito.
- Latest