Magtiyahin tiklo sa P110-M shabu
MANILA, Philippines - Nasakote ng mga pulis ang isang magtiyahin sa isinagawang buy bust operation at nakumpiska sa kanila ang nasa 22 kilo ng high grade shabu na nagkakahalaga ng P110 milyon kahapon ng umaga sa Guadalupe, Makati City.
Ang mga nasakoteng suspect ay kinilalang sina Maria Rosario Echaluce, 38; at pamangkin nitong Angelo Echaluce,19; pawang mga residente ng #0377 Cervo Compound, Brgy. Bilibiran, Binangonan, Rizal.
Bago naaresto ang magtiyahin dakong alas-8:30 ng umaga sa bisinidad ng ABC Building, Guadalupe, Makati City ay galing ang mga ito sa Muntinlupa City at bumaba sa nasabing lugar para ideliber ang isang kilong shabu sa halagang P1-M sa isang pulis na nagpanggap na poseur buyer.
Inaresto ang mga ito habang iniaabot ang 1-M halaga ng droga at nakuha ang karagdagan pang 21 kilo ng shabu sa dala nilang bagahe.
Sinabi ni Dela Rosa na ang mastermind ng nasabing sindikato ay isang Chinese national na nakabase sa Hong Kong.
Inihayag ni Dela Rosa na ang suspek na si Ma. Rosario ay may live-in partner na nakilalang si Hilario Labadero na kasalukuyang nakakulong sa NBP na may kasamahang inmate na drug lord sa piitan na siya namang may kontak sa supplier ng mga itong Chinese drug lord mula sa Hong Kong.
Naniniwala ang mga opisyal na malaking sindikato ng droga ang kinabibilangan ng magtiyahin at kanilang tutugisin ang Chinese drug lord na kontak ng mga ito.
Aalamin din ng PNP ang posibleng koneksiyon ni Labadero sa drug lord na si Franz Sabalones ng Cebu na una nang sumuko sa Camp Crame noong Agosto.
- Latest