Madugong rali: 2 magsasaka patay, 40 sugatan
MANILA, Philippines - Nauwi sa madugo ang pagbuwag ng mga pulisya sa rali ng magsasaka na ikinasawi ng dalawang katao at pagkasugat ng 40 iba pa sa national highway ng Kidapawan, partikular sa hangganan ng Kidapawan City at sa bayan ng Makilala, North Cotabato kahapon ng umaga.
Ayon kay Norma Capuyan, Chairman ng Sandawa Lumadnong Panaghiusa-Cotabato, Chairman ng organisasyon ng mga Lumad o katutubo na isa nilang lalaking kasama ang nasawi.
Kabilang sa 40 nasugatan ay sina Roger Imuy, 48; Darwin Madiao, 18; Leo Deyong, 28; Mario Ansabo, 47; Roland Jampas, 26; Alce Awi, 35; Ejay Salaber, 54; Ricky Maat, 23; Rodolfo Tano.
Bago ito ay nagbarikada ang mga Lumad sa tanggapan ng National Food Authority (NFA) hanggang maging ang Cotabato-Davao highway sa lungsod na nasa ikatlong araw nang naparalisa ang biyahe ng mga behikulo at kalakal.
Sinabi naman ni PNP Spokesman Chief Supt. Wilben Mayor, sinabi nito na inaalam na nila ang lahat ng mga kaganapan kung bakit humantong sa madugong insidente ang pagbuwag sa barikada ng mga katutubong Lumad sa Cotabato-Davao highway ng lungsod.
Sa inisyal na ulat na nakarating sa Camp Crame, nabatid na nag-ugat ang kaguluhan matapos na kuyugin ng mga raliyista ang dalawang pulis na pinagpupukpok sa ulo kabilang dito ay isang PO1 Juntalan habang pinagbabato rin umano ng mga galit na katutubo ang dispersal team bandang alas-10:30 ng umaga na siyang pinag-ugatan ng gulo.
Dito ay nagkaroon ng putukan na ikinasawi ng isang raliyista na kabilang sa kumukuyog sa dispersal team habang nasa 40 pa ang nasugatan sa mga ito.
Sinasabing hinakot umano ng mga lider militante ang nasa 5,000 mga katutubong Lumad na pinangakuan ng tig-iisang kaban ng bigas bunga na rin ng nararanasang tagtuyot sa lugar.
- Latest