Babae todas matapos dumalo sa misa ng Santo Papa sa Tacloban
MANILA, Philippines – Namatay noon din ang isang 21- anyos na babaeng taga Samar nang mabagsakan ng sound system nang bumigay ang tinutungtungan na scaffoldings malapit sa altar dahil sa malakas na hangin dulot ng bagyong Amang pagkatapos ng misa ni Pope Francis sa Tacloban City kahapon.
Ang biktima ay kinilalang si Kristel Padasas, volunteer ng Catholic Relief Service.
Batay sa ulat, katatapos lamang magmisa ni Pope Francis sa Daniel Romualdez Airport nang bigla na lamang bumagsak ang scaffoldings at tumama sa mukha ng biktima ang speaker malapit sa altar na agad nitong ikinamatay.
Ang biktima ay kabilang sa halos 150,000 katao na dumayo sa Tacloban City para dumalo sa misa ni Pope Francis na hindi ininda ang bagyo ng magtungo sa lungsod at Palo, Leyte.
Ang Eastern Visayas ay nasa ilalim ng signal No. 2 dulot ng pananalasa ng bagyong Amang.
Dahil sa masamang lagay ng panahon ay napilitan naman si Pope Francis at ang entourage nito na paikliin ang kanilang biyahe sa Leyte kung saan maayos ang mga itong nakabalik sa Maynila.
- Latest
