Dalawang PO1 dinakip sa indiscriminate firing

MANILA, Philippines – Inaresto ng mga pulis ang dalawa nilang kabaro na inireklamo ng walang habas na pagpaputok ng kanilang baril kamakalawa sa Pagadian City.

Ang mga inarestong pulis ay kinilalang sina  PO1 Razul Lawi, 32, nakatalaga sa Pitogo Police at PO1 Tay Julius Sta. Teresa, nakadestino naman sa Regional Public Safety Battalion (RPSB) ng ARMM Police na kinasuhan kahapon ng umaga sa City Prosecutors Office ng kasong alarm and scandal at indiscriminate firing.

Batay sa ulat, dakong alas-3:30 ng madaling-araw ay walang habas na nagpaputok sa ere ang dalawang pulis matapos na  makipagtalo sa mga guest relations officers ng KTV Bar sa panulukan ng Sanson Street at Pajares Avenue sa Brgy. San Pedro ng lungsod.

Nang magresponde ang mga pulis ay tinangkang tumakas ng dalawang suspek kaya’t  hinabol ang mga ito hanggang sa maaresto.