18,518 katao apektado ng bagyong Basyang
MANILA, Philippines - Nasa 18,518 katao ang naapektuhan kabilang ang 9,541 pasahero ang stranded sanhi ng hagupit ng bagyong Basyang.
Iniulat ni National Disaster Risk Reduction and Management Council (NDRRMC) Executive Director Eduardo del Rosario, naitala sa 3,698 pamilya o kabuuang 18,518 katao ang naapektuhan at ngayo’y kinukupkop sa may 74 evacuation centers sa Region VI, Region VIII at CARAGA Region matapos na limang beses magland-fall si Basyang.
Unang nag-landfall si Basyang sa Siargao Island sa CARAGA Region bandang alas-6:00 ng gabi nitong Biyernes; Padre Burgos, Southern Leyte, alas-9:00 ng gabi; Ubay, Bohol, dakong alas-11:00 ng gabi; San Miguel, Bohol, 11:00 ng gabi at Naga City, Cebu dakong alas-12:00 naman ng hatinggabi.
Nasa 9,541 pasahero, 164 behikulo, 877 rolling cargoes at 21 bangkang de motor ang stranded sa mga pantalan ng Maynila; Cebu; Tagbilaran City, Bohol; Ormoc at Tacloban City; pawang sa Leyte; Catbalogan, Samar; Masbate, Sorsogon, Cagayan de Oro, Surigao, Ozamis City, Butuan, Dapitan; Iloilo at Bacolod City.
Naglaan na rin ang pamahalaan ng P104.30-M halaga ng emergency relief resources na kinabibilangan ng P54.91 M standby funds; P48,044 family food packs na nagkakahalaga ng P11.67 M, at iba pang food packs P37.72 M para sa mga evacuees o mga pamilyang apektado ng bagyo.
Inaasahan namang lalabas na ng bansa si Basyang bandang hapon ngayong araw matapos humina na ito kung saan nasa 11 lugar na lamang ang nasa ilalim ng signal number 1.
- Latest
