PO1 tinodas sa pag-uwi ng bahay

MANILA, Philippines - Dead-on-the-spot ang isang pulis na sakay ng motorsiklo pauwi sa kanilang bahay matapos barilin sa batok ng hindi pa nakilalang suspek sa kahabaan ng Maguyam Road, Brgy. Maguyam, Silang, Cavite.

Ang biktima ay nakilalang si PO1 Hasim Farinas, 32, ng Blk. 4, Lot 3, Mabuhay City, Brgy. Mamatid, Cabuyao, Laguna at nakatalaga sa Silang Police Station.

Batay sa ulat, dakong alas-7:30 ng gabi ay sakay ang biktima ng kanyang motorsiklo pauwi sa kanilang bahay at habang binabagtas ang liblib na lugar ay bigla na lamang sumulpot ang hindi pa kilalang suspek at binaril ito sa batok.

Nang bumulagta ang biktima ay tinangay ng suspek ang service firearm nito.

Malaki ang hinala ng pulisya na matagal nang inaabangan ng suspek ang biktima dahil sa alam nito ang dinaraanan sa pag-uwi.