Walang makapigil sa Nets
NEW YORK — Nagsalpak si Kyrie Irving ng 27 points para banderahan ang Brooklyn Nets sa 139-103 pagmasaker sa San Antonio Spurs diretso sa kanilang ika-12 sunod na arangkada.
May 25 markers at 11 assists si Kevin Durant kasunod ang 18 points ni T.J. Warren para sa Nets (25-12) na sumasakay sa kanilang pinakamahabang winning streak sa NBA ngayong season.
Umiskor naman si Keldon Johnson ng 22 points sa panig ng Spurs (12-25).
Nagsalpak si Irving ng 15 points tampok ang tatlong triples para sa 37-25 abante sa first period patungo sa 46-27 pagbaon sa San Antonio bago ang halftime.
Mula rito ay hindi na nilingon ng Nets ang Spurs.
Sa Charlotte, humataw si LeBron James ng 43 points para igiya ang Los Angeles Lakers (16-21) sa 121-115 pagdaig sa Hornets (10-28)..
May career total na 37,903 points ngayon si James sa ilalim ng record na 38,387 points ni NBA great Kareem Abdul-Jabbar.
Sa Cleveland, nagtala si Donovan Mitchell ng record na 71 points para kumpletuhin ng Cavaliers, (24-14) ang pagbangon mula sa 21-point deficit at igupo ang Chicago Bulls (16-21) sa overtime, 145-134.
Sa Houston, kumolekta si Luka Doncic ng 39 points, 12 rebounds at 8 assists sa 111-106 panalo ng Dallas Mavericks (22-16) sa Rockets (10-27).
Sa Philadelphia, humakot si Joel Embiid ng 42 points at 11 rebounds at may 27 markers si James Harden sa 120-111 paggupo ng 76ers (22-14) sa New Orleans Pelicans (23-14).
- Latest
