Warriors giba sa TD ni Jokic
SAN FRANCISCO— Itinala ni Nikola Jokic ang kanyang ika-77 career triple-double para banderahan ang Denver Nuggets sa 128-123 pagdaig sa nagdedepensang Golden State Warriors.
Tumapos si Jokic na may 26 points, 12 rebounds at 10 assists para sa Denver na sinibak ng Golden State sa first-round playoff series ng nakaraang season patungo sa paghablot sa NBA crown.
Nakaiskor si Jordan Poole sa huling 14.7 segundo ng fourth period para ilapit ang Warriors sa 123-124 agwat kasunod ang dunk ni Bruce Brown mula sa long pass ni Jokic para sa 126-123 abante ng Nuggets.
Bigo si Klay Thompson na maitabla ang Golden State nang pumaltos ang kanyang 3-point attempt sa natitirang 9.3 segundo.
Humataw si Stephen Curry ng 34 points kasama ang limang tres para sa defending champions.
Sa Miami, humataw si Jayson Tatum ng 29 points at may 28 markers si Jaylen Brown sa 111-104 panalo ng Boston Celtics sa Heat sa rematch ng nakaraang Eastern Conference finals.
Tumipa si Tyler Herro ng 25 points para sa Miami.
Sa New York, isinalpak ni Kevin Durant ang isang triple sa huling 56 segundo para tumapos na may 27 points sa 109-105 pagtakas ng Brooklyn Nets sa Toronto Raptors.
- Latest
