E-Painters diniskaril ang Bossing
MANILA, Philippines — Hinarang ng Rain or Shine ang papasok ng Blackwater sa quarterfinals matapos agawin ang 107-90 panalo sa 2022 PBA Philippine Cup kahapon sa Smart Araneta Coliseum.
Ang ikalawang sunod na ratsada ng Elasto Painters matapos ang six-game losing slump ang nagtaas sa kanilang baraha sa 3-6 para makasilip ng tsansa sa eight-team quarterfinals cast.
Tumipa si Rey Nambatac ng 26 points, 7 rebounds, 4 assists at 2 steals habang may 20, 12 at 10 markers sina rookie Gian Mamuyac, Beau Belga at Gabe Norwood, ayon sa pagkakasunod.
“Lagi kong sinasabi sa mga bata (rookies) na galing na kami sa sitwasyon na ganito, so alam na namin kung ano iyong culture sa game na ito,” sabi ni Nambatac.
Nalasap ng Bossing ang kanilang ikalawang dikit na kabiguan para sa 5-3 marka matapos magposte ng four-game winning streak.
Inagaw ng Blackwater ang 40-31 abante sa gitna ng second period bago nakabangon ang Rain or Shine para ilista ang 11-point lead, 63-52, sa 5:27 minuto ng third quarter.
Nakalapit ang Bossing sa 76-80 agwat sa 9:37 minuto ng final canto sa pagbibida nina No. 1 overall pick Brandon Ganuelas-Rosser, rookie Ato Ular at Baser Amer.
Ngunit isang 19-7 atake ang ginawa ng Elasto Painters tampok ang three-point shot ni big man Norbert Torres para sa kanilang 99-83 kalamangan sa huling 2:27 minuto.
Sa ikalawang laro, kinuryente ng Meralco (5-3) ang Barangay Ginebra (6-3) mula sa 90-73 panalo para patibayin ang pag-asa sa quarterfinals.
- Latest
