Rain or Shine humihinga pa
MANILA, Philippines — Hindi bumitaw ang Rain or Shine sa kanilang kalamangan sa kabila ng paghahabol ng NLEX para kunin ang 96-86 panalo sa 2022 PBA Philippine Cup kahapon sa Smart Araneta Coliseum.
Umiskor si forward Santy Santillan ng 16 sa kanyang 18 points sa first half habang isinalpak ni rookie guard Gian Mamuyac ang krusyal na triple sa dulo ng fourth period para pigilin ang six-game losing skid ng Elasto Painters.
Ito naman ang ikatlong dikit na kamalasan ng Road Warriors para sa 4-5 baraha.
“I can’t be more proud of how we came out today with the energy and effort,” sabi ni coach Chris Gavina sa Rain or Shine na may 2-6 record ngayon para makasilip ng pag-asa sa quarterfinals. “These guys have gone through adversity.”
Nakabangon ang NLEX mula sa 21-point deficit, 38-59, sa third quarter para makadikit sa 82-90 agwat mula sa apat na sunod na free throws ni Kevin Alas sa 3:58 minuto ng fourth period.
Ngunit kumonekta si Mamuyac ng tres na naglayong muli sa Elasto Painters sa 93-82 sa huling 3:36 minuto ng laro kasunod ang mintis at turnover ng Road Warriors.
Kinumpleto ni forward Mark Borboran ang kanyang 3-point play para sa 96-82 kalamangan ng Rain or Shine sa huling 2:16 minuto ng labanan.
Nahirapan na ang NLEX na muling makalapit.
Tumapos si Mamuyac na may 15 markers para sa Elasto Painters at may 13, 12 at tig-10 points sina Norbert Torres, Rey Nambatac, Gabe Norwood at Beau Belga, ayon sa pagkakasunod.
- Latest
