CSB magpapatatag sa tuktok
MANILA, Philippines — Mapatatag ang kapit sa solong pamumuno at maingatang madungisan ang rekord ang pakay ng College of Saint Benilde sa pagsagupa nito sa mapanganib na San Sebastian College-Recoletos sa pagpapatuloy ng NCAA Season 97 women’s volleyball tournament ngayong araw sa Paco Arena sa Maynila.
Haharapin ng Lady Blazers ang Lady Stags sa alas-12 ng tanghali na susundan ng salpukan ng Mapua University at San Beda University sa alas-2:30 ng hapon.
Nangunguna ang Benilde hawak ang malinis na 5-0 rekord kabuntot ang reigning champion Arellano University (5-1) at San Sebastian (4-1).
Sariwa pa ang Lady Blazers sa matikas na 25-17, 25-11, 25-12 panalo laban sa Lady Cardinals para ukitin ang kanilang ikalimang sunod na panalo.
Bida sa naturang laro si Mycah Go na naglista ng 12 hits at 10 receptions.
Maliban kay Go, naasahan din ng Benilde sina Jade Gentapa at Gayle Pascual habang si Cloanne Mondonedo naman ang sasandalan ng Lady Blazers sa playmaking.
Sa kabilang banda, mataas din ang moral ng San Sebastian na namayani sa University of Perpetual Help System Dalta sa 24-26, 26-28, 25-20, 25-20, 17-15 desisyon.
Hangad ni Lady Stags head coach Roger Gorayeb na mapanatili ang magandang inilalaro ng kanyang tropa upang mapalakas ang tsansa nito sa twice-to-beat advantage.
- Latest