2 malaking break para kay Cone
MANILA, Philippines — Pambihirang karangalan at malaking pagkakataon para kay Ginebra coach Tim Cone ang dalawang bagong oportunidad para sa Gilas Pilipinas at Miami Heat bilang dagdag na palamuti sa kanyang makulay at de-kalibreng karera.
Maituturing na isa sa pinakamagaling na coach sa Pilipinas tampok ang 24 championships sa PBA, sasama si Cone sa coaching staff ng Gilas para sa 2023 FIBA World Cup at sa Heat sa 2022 NBA Summer League sa Hulyo.
Sa Gilas ay makakasama ni Cone sina head coach at program director Chot Reyes, Nenad Vucinic, Jong Uichico at Goldwin Monteverde.
Pero sabik na siyang makadaupang palad ang mga world-class coaches sa pangunguna ni Steve Kerr ng Team USA na dadayo dito sa Pinas sa susunod na taon.
“I’m extremely happy and completely honored to be a part of it. I don’t think there’s anything more thrilling than having the greatest coaches and players come to our shores and play basketball. Being part of it is an amazing thing,” ani Cone.
Bagama’t wala pang detalyadong trabaho para sa Gilas, nangako si Cone ng buong suporta kay Reyes.
Upang maisakatuparan ito ay umaasa si Cone sa aral at karanasang makukuha sa Heat bilang assistant coach na makakatulong din sa kanyang karera sa PBA para sa Ginebra at sa Gilas.
- Latest
