Letran back-to-back champions
MANILA, Philippines — Tuluyan nang winalis ng Letran Knights ang Mapua Cardinals sa kanilang championship series para angkinin ang ikalawang sunod na korona sa Season 97 NCAA men’s basketball kahapon sa Filoil Flying V Arena sa San Juan City.
Muling pinatumba ng Knights ang Cardinals sa Game Two, 75-65, para kumpletuhin ang 2-0 sweep sa kanilang best-of-three titular showdown at angkinin ang ika-19 korona.
Humataw si Rookie of the Year at Most Valuable Player Rhenz Abando ng 14 points, 12 rebounds at 2 blocks para pamunuan ang Letran ni coach Bonnie Tan na kinuha ang Game One, 68-63.
Nag-ambag si PBA-bound Jeo Ambohot ng 13 markers at kumolekta si Louie Sangalang ng 11 points, 13 boards, 4 assists at 3 blocks.
Huling naging back-to-back champions ang Knights noong 1998 at 1999 habang dinuplika nila ang season sweep ng San Beda Red Lions noong 2010.
Ipinoste ng Letran ang 21-point lead, 44-23, sa second period bago nakadikit ang Mapua sa 65-70 sa huling 2:13 minuto ng fourth quarter mula sa triple ni Paolo Hernandez.
Ang dalawang magkahiwalay na basket ni Abando ang muling naglayo sa Knights sa 74-65 sa nalalabing 1:13 minuto.
Tumipa sina Hernandez at Adrian Nocom ng tig-14 points para sa Cardinals at may 12 at 10 markers sina Brian Lacap at Arvin Gamboa, ayon sa pagkakasunod.
- Latest
