Pinas ‘di pumayag na mabokya sa SEAG
Archery, bilyar at athletics nagdeliver ng gold
MANILA, Philippines — Hindi pumayag ang mga Pinoy athletes na mabokya matapos magbulsa ng tatlong gintong medalya sa 31st Southeast Asian Games kahapon sa Hanoi, Vietnam.
Humugot ang Team Philippines ng mga panalo kina billiards ace Johann Chua, Fil-Am sprinter Kayla Richardson at archers Pia at Abby Bidaure at Phoebe Amistoso para sa pakikipag-agawan sa Thailand sa No. 2 spot sa medal standings.
Sinapawan ni Chua si 2021 U.S. Open champion Carlo Biado, 9-6, para tumbukin ang ginto sa men’s 9-ball singles sa kanilang all-Pinoy finals.
Sinamantala ng 29-anyos na si Chua ang dalawang mintis ng 39-anyos na si Biado sa 12th at 15th racks para kunin ang una niyang gold sa SEA Games.
Nabigo ang 67-anyos na si Efren ‘Bata’ Reyes kay Tran Thanh Tu Nguyen ng Vietnam, 55-100, sa semis ng one-cushion carom singles at nakuntento sa tansong medalya.
Nagtala naman si Richardson ng tiyempong 11.60 segundo para ibulsa ang gold medal sa women’s 100m dash sa athletics.
Sa archery, inilusot ng magkapatid na Bidaure at ni Amistoso ang 26-25 panalo kontra sa Vietnam sa kanilang shoot-off para angkinin ang ginto sa women’s team recurve.
Nagtala ang Pinas ng 37 golds, 48 silvers at 64 bronzes para sa No. 3 spot medal standings sa ilalim ng bagong overall champion na Vietnam (122-74-72) at No. 2 Thailand (49-57-77).
May silver medal sina taekwondo jins Kirstie Alora (women’s -73kg), Baby Jessica Canabal (women’s -54kg) at Dave Cea (men’s -74kg) at sina Richard Gonzales at John Russel Misal sa men’s doubles ng table tennis.
Humataw ng bronze sina golfers Lois Kaye Go, Rianne Malixi at Mafy Singson sa women’s team event, Evalyn Palabrica sa women’s javelin throw, sina fencers Jylyn Nicanor, Queen Denise Dalmacio, Allaine Nicole Cortey at Kemberly Camahalan sa women’s team sabre at sina Nathaniel Perez, Samuel Tranquilan, Prince Felipe at Michael Nicanor sa men’s team foil.
Sa boxing, sigurado na sa tansong medalya sina Tokyo Olympics silver medalist Nesthy Petecio (women’s 60kg) at Tokyo Olympics bronze medalist Eumir Felix Marcial (men’s 75kg) at pito pang Pinoy pugs.
Nakatiyak din ng dalawang bronze si tennis sensation Alex Eala matapos umusad sa semis ng women’s singles at sa mixed doubles kasama si Treat Huey.
- Latest