Letran, Mapua agawan sa 1-0 lead
MANILA, Philippines — Puntirya ng nagdedepensang Letran Knights ang kanilang ika-11 sunod na panalo sa pagharap sa Mapua Cardinals sa NCAA Season 97 men’s basketball championship sa Filoil Flying V Arena sa San Juan City.
Nakatakda ang Game One ng best-of-three title series ng Knights at Cardinals ngayong alas-3 ng hapon.
Winalis ng Letran ang siyam na laro sa elimination round at sinibak ang No. 4 Perpetual, 77-75, sa Final Four habang nakalusot ang Mapua sa No. 3 San Beda Red Lions, 70-67, sa kanilang ‘do-or-die’ game.
Dinomina ng Knights ang Cardinals, 80-60, sa eliminasyon noong Abril 8.
Sina Fran Yu, Rhenz Abando, Jeo Ambohot, Louie Sangalang at Brent Paraiso ang babandera para sa Letran kontra kina Arvin Gamboa, Brian Lacap, Paolo Hernandez at Toby Agustin ng Mapua.
“Para sa akin, ayoko nang maging bridesmaid ulit. Ayoko nang maging runner-up,” sabi ni Abando na bahagi ng UST Growling Tigers na natalo sa Ateneo Blue Eagles sa UAAP Finals noong 2019.
Target ng Knights ang kanilang ikalawang sunod na korona habang hangad ng Cardinals ang una nilang titulo matapos noong 1991 sa panahon nina coach Randy Alcantara at Benny Cheng.
- Latest