Kiefer, Shiga winalis ang Osaka
MANILA, Philippines — Sa pangunguna ni Kiefer Ravena ay winalis ng Shiga Lakestars ang Osaka Evessa sa back-to-back weekend duel upang mapatid ang 16-game losing slump sa 2021-2022 Japan B. League.
Sa tulong ng homecourt advantage sa Ukaruchan Arena ay umiskor ang Shiga ng 79-78 at 88-78 panalo laban sa Osaka.
Huling nanalo si Kiefer at ang Shiga kontra sa kapatid na si Thirdy at sa San-en NeoPhoenix, 104-100, noong Pebrero 26.
Ito rin ang unang back-to-back wins ng Shiga simula noong Disyembre 25 at 26 nang walisin nila ang Niigata Albirex BB ni Kobe Paras.
Dahil dito ay umangat sa 12-33 record ang Lakestars na tengga pa rin sa ika-20 puwesto ng 22-team B. League.
Samantala, hindi nakapaglaro sina Gilas Pilipinas Dwight Ramos at Thirdy Ravena sa 2-0 sweep ng Toyama Grouses kontra sa San-en, 92-80 at 93-86.
Hindi naman natuloy ang laban ni Ray Parks Jr. ng Nagoya Diamond Dolphins (26-12) at Kobe Paras ng Niigata Albirex BB (5-39) dahil sa COVID-19 protocols.
Kanselado rin ang laro ni Matthew Aquino ng Shinshu Brave Warriors (22-24) kontra Mikawa at Javi Gomez de Liaño ng Ibaraki Robots (13-31) laban sa Utsunomiya.
- Latest