No. 2 spot paglalabanan ng La Salle at UP
MANILA, Philippines — Pag-aagawan ng De La Salle University at University of the Philippines ang solong No. 2 spot sa kanilang pagtatagpo ngayong araw sa UAAP Season 84 men’s basketball tournament sa Mall of Asia Arena sa Pasay City.
Magtutuos ang Green Archers at Fighting Maroons sa alas-10 ng umaga kasunod ang bakbakan ng University of Santo Tomas at National University sa ala-1 ng hapon.
Sesentro rin ang atensiyon sa defending champion Ateneo na target ang ikaanim na sunod na panalo para mapatatag ang liderato sa pagsagupa sa University of the East sa alas-4 ng hapon.
Maghaharap naman sa huling laro ang Adamson University at Far Eastern University sa alas-7 ng gabi.
Parehong galing sa panalo ang La Salle at UP para pagsaluhan ang ikalawang puwesto tangan ang magkatulad na 4-1 baraha sa ilalim ng Ateneo na may 5-0 karta.
Pinataob ng Green Archers ang Growling Tigers noong Martes sa pamamagitan ng 75-66 panalo kung saan bumida si big man Justine Baltazar na nagsumite ng 20 points, 7 rebounds at 5 assists.
Dumaan naman sa butas ng karayom ang Fighting Maroons bago kubrahin ang 73-71 panalo sa Soaring Falcons.
- Latest
