Marcial hahasain ni Heredia

MANILA, Philippines — Inaasahang mas mahahasa nang husto si Tokyo Olympics bronze medalist Eumir Felix Marcial sa ilalim ng paggiya ni Mexican strength and conditioning coach Angel Memo Heredia.

Ang 46-anyos na si Heredia ang nasa likod ng mga panalo nina Mexican boxing legend Juan Manuel Marquez at Cuban world welterweight titlist Yordenis Ugas laban kay Filipino world eight-division king Manny Pacquiao.

Binuksan na ni Marcial ang kanyang training camp sa Las Vegas, Nevada para paghandaan ang ikalawa niyang professional fight sa huling linggo ng Marso.

Kitang-kita sa unang ensayo ng 25-anyos na si Marcial ang kasabikang mapasailalim kina Heredia at Mexican trainer Jorge Capetillo na minsang humawak kay John Riel Casimero.

Halos kalahating taong hinawakan ni Heredia si Ugas bago talunin si Pacquiao via unanimous decision para mapanatiling suot ang World Boxing Association (WBA) welterweight crown noong Agosto ng 2021 sa T-Mobile Arena.

Sinabi ni Sean Gibbons, ang pangulo ng MP Promotions ni Pacquiao, na posibleng gawin ang laban ng middleweight fighter na si Marcial alinman sa Las Vegas o Los Angeles, California.