Juico tuluyan nang initsapuwera ng POC

MANILA, Philippines — Tuluyan nang idineklara ng Philippine Olympic Committee (POC) General Assembly na persona non grata si Philippine Athletics Track and Field Association (PATAFA) president Philip Ella Juico nang ratipikahan kahapon sa isang Zoom meeting ang naunang resolusyon ng Executive Board.

Nilinaw ni POC president Abraham ‘Bambol’ Tolentino na patuloy pa rin nilang kikilalanin ang PATAFA bilang miyembro ng POC bagama’t isa nang persona non grata si Juico.

“PATAFA can still continue their everyday activities,” wika ni Tolentino sa athletics association na maaari pa ring kumilos sa pamamagitan ng kanilang vice-president at secretary general. “Hindi naman namin ina-oust ang PATAFA.”

Pumabor sa nasabing resolusyon ang 36 miyembro ng POC General Assembly kasama si Olympic gold medalist Hidilyn Diaz at dalawang kasapi ng athletes’ commission.

Ang rekomendasyon ng POC Executive Board ay matapos ang ginawang imbestigasyon ng Ethics Committee sa harassment complaint ni national pole vaulter Ernest John Obie-na laban kay Juico.

Ito ay dahil sa sinasabing dinoktor na liquidation papers na isinumite ni Obiena sa PATAFA ukol sa coaching fee ni Ukranian trainer Vitaly Petrov.

Ayon kay Tolentino, maaari pang mabaligtad ang nasabing deklarasyon ng POC General Assembly kay Juico kung babawiin ni Obiena ang kanyang reklamo at magkakasundo sila ng PATAFA chief. “Anytime na magkasundo sina Juico and EJ (Obiena), then i-withdraw ni EJ iyong complain, the Executive Board and the General Assembly can revisit this decision,” ani Tolentino.

Dumalo rin si Juico sa nasabing General Assembly at ibinigay ang kanyang saloobin.