Clarkson vs Herro

Muling nasa karera para sa Sixth Man of the Year award ang Fil-Am hotshot na si Jordan Clarkson, pero medyo dehado siya sa kalagitnaan ng 2021-22 NBA regular season.

Bahagya kasing bumaba ang kanyang mga numero kumpara sa kanyang stat line noong nakaraang season.

Kasabay naman nito ang paghugot ng mas magandang numero nina Tyler Herro ng Miami Heat at Kelly Oubre Jr. ng Charlotte Hornets.

Kasama rin na nababanggit na solid contender ang 2020 winner na si Montrezl Harrell. Muling matibay sa laban si Harrell matapos malipat sa Washington mula LA Lakers.

Top favorite si Clarkson sa mga unang sultada ng season bago sumirit pataas ang laro ni Herro.

Humuhugot si Herro ng 20.7 points, 5.1 rebounds at 4.1 assists sa 32.9 minutes per game. Mahaba ang kanyang minuto pero mas madalas lumaro off the bench.

Nagpapakita naman ng averages na 15.3 points, 3.4 rebounds and 2.2 assists sa 26 minutes na paglalaro si Clarkson. Noong nakaraang season, kumamada siya ng 18.4 points, 4.0 rebounds at 2.5 assists per game.

Parehong running third sa magkabilang conferences ang mga koponan nina Clarkson at Herro.

Tangan nina Herro at ng Miami Heat ang 27-16 kartada sa East, samantalang 29-14 naman sina Clarkson at Utah Jazz sa West.

Parehong worthy winner kung sinuman ang mahihirang na Sixth Man of the Year sa pagitan nina Clarkson at Herro.