Ancajas si Martinez muna ang haharapin
Next ka na Ioka
MANILA, Philippines — Sasalang muna si reigning International Boxing Federation (IBF) junior bantamweight champion Jerwin Ancajas sa title defense nito sa Pebrero 19 (Pebrero 20 sa Maynila) bago harapin si Japanese champion Kazuto Ioka.
Nakatakdang makaharap ni Ancajas si Argentinian boxer Fernando Daniel Martinez ngunit wala pang pinal na desisyon sa pagdarausan ng laban.
Plano itong idaos sa Amerika — sa isang venue sa New York City o New Jersey.
Nakatakda sanang makasagupa ni Ancajas si Ioka — ang reigning World Boxing Organization (WBO) junior bantamweight king — noong Disyembre 31 sa Tokyo, Japan.
Ngunit nakansela ito matapos sumulpot ang mas mapanganib na Omicron variant ng coronavirus disease (COVID-19) na siyang naging dahilan ng paghihigpit ng gobyerno ng Japan sa pagpasok ng mga foreigners sa kanilang bansa.
“Team Ancajas was looking forward to this historic fight against Ioka but understands there are bigger concerns than boxing in Japan and the world with the situation caused by the emergence of the latest variant,” ani MP Promotions chief Sean Gibbons sa panayam ng RingTV.
Sa oras na matapos ang laban ni Ancajas kay Martinez, nangako si Gibbons na ikakasa nito ang unification fight ng Pinoy pug at ng Japanese fighter sa taong ito.
“We remain committed to making this fight happen as soon as possible in Japan,” ani Gibbons.
Handa naman si Ioka na hintayin si Ancajas para sa unification fight.
- Latest