Sweep ng F2 Logistics

LIPA CITY, Philippines — Nakumpleto ng F2 Logistics ang perpek-tong kampanya para makopo ang titulo sa kauna-unahang Champions League matapos kaldagin ang Chery Tiggo, 25-20, 25-20, 25-22 kahapon dito sa Aquamarine Recreational Center Gym sa Lipa, Batangas.

Hindi natalo kahit isang set lang ang Cargo Movers sa limang laro para sa malinis na championship run at maugong na pagbabalik sa Philippine volleyball matapos ang halos dalawang taong pagkawala.

Naglista ng 16 puntos si Kalei Mau upang banderahan ang 5-0 kartada ng F2 Logistics habang may siyam, walo at anim na markers sina Majoy Baron, Aby Maraño at Kianna Dy, ayon sa pagkakasunod.

“Siguro, advantage lang na matagal na kaming magkakasama. Gustung-gusto lang din maglaro ng team dahil matagal nabakante,” ani coach Ramil de Jesus matapos huling maglaro noong Marso 2020.

Tinanghal na unang Champions League Most Valuable Player si Kianna Dy at Best Opposite Spiker din habang Best Outside Hitters naman sina Ces Molina ng Petro Gazz at Dindin Santiago-Manabat ng Chery Tiggo. Sinikwat nina Maraño (F2) at Maika Ortiz (Chery) ang Best Middle Blocker awards habang Best Setter at Best Libero sina Iris Tolenada at Dawn Macandili ng Cargo Movers, ayon sa pagkakasunod.