Aquino isinama sa Japan training pool para sa 2023 FIBA World Cup Asian qualifiers
MANILA, Philippines — Napasama si Matthew Aquino sa 24-man pool ng Japan national team para sa first window ng 2023 FIBA World Cup Asian Qualifiers simula ngayong buwan.
Inihayag ng Japan Basketball Association (JBA) ang training pool nito kasali ang dating UAAP standout na nag-lalaro ngayon para sa Shinshu Brave Warriors sa Japan B. League.
“I am honored to be selected as a candidate for the Japanese national team,” ani Aquino na may Japanese nationality mula pa sa kanyang lola.
Sa katunayan ay bilang local player naglalaro si Aquino, anak ni PBA legend Marlou Aquino, sa B.League kumpara sa walong Filipino players doon na nagsisilbing import sa ilalim ng Asian Player Quota program.
Naglaro si Aquino para sa Adamson Falcons at National University Bulldogs sa UAAP bago sumalang sa MPBL at sa B.League.
Kung sakaling makuha sa final 12-man roster ng Japan ay makikilatis si Aquino kontra sa China sa back-to-back home games nila sa Nobyembre 27 at 28 para sa first window ng World Cup Asian Qualifiers.
Nasa Group B ang Japan kasama ang China, Australia at Chinese Taipei.
Pasok na ang Japan sa 2023 FIBA World Cup Qualifiers bilang co-host ng prestihiyosong quadrennial tournament kasama ang Pilipinas at Indonesia.
- Latest
