Tapatang Thirdy Ravena-Kobe Paras sa Japan

MANILA, Philippines — Mula sa Katipunan ay sa Japan naman ipagpapatuloy nina Thirdy Ravena at Kobe Paras ang kanilang kompetisyon sa bigating salpukan ng San-en NeoPhoenix at Niigata Albirex BB sa ikalawang linggo ng umaatikabong 2021-2022 B. League.

Magtutuos ang dalawang matalik na magkaibigan sa 5:05 ng hapon (Manila time) sa homecourt nina Ravena at NeoPhoenix sa Hamamatsu Arena bago muling magharap bukas sa parehong oras.

Ito ang kanilang unang duwelo matapos magtagisan sa ilang “Battle of Katipunan” games sa UAAP kung saan naglaro si Ravena para sa Ateneo Blue Eagles at si Paras sa UP Fighting Maroons.

Subalit bago pa iyon ay naging magkakampi na rin sila sa grade school para sa La Salle Greenhills kaya’t itinuturing na sanggang dikit ang isa’t isa hanggang ngayon sa Japan kung saan dalawa sila sa walong Filipino imports.

“Kobe and I have been friends for a long time so it’s really fun,” ani Ravena. “This weekend, magkalaban muna kami. It’s gonna be very exciting and at the same time, it’s something the Filipino people would hopefully be proud of once again.”

Sasalang din uli sina Kiefer Ravena (Shiga Lakestars) at Juan Gomez de Liano (Earthfriends Tokyo Z) habang hindi pa rin makakalaro si Ray Parks Jr (Nagoya Diamond Dolphins) bunsod ng muscle strain injury.